कोकेन तस्करी गर्ने रूसी राजदूतावासको योजना विफल

अर्जेन्टिनाको सुरक्षा मन्त्रालयले कोकेन युरोपमा तस्करी गर्ने रूसी राजदूतावासको कुरियर सेवाको योजना विफल बनाइदिएको जनाएको छ।प्रहरीले रूसी राजदूतबाट प्राप्त जानकारी अनुसार राजदूतावाससँग जोडिएको परिसरबाट ४ सय केजी कोकेन जफत गरेको थियो।
त्यसपछि उनीहरूले एउटा गोप्य कारबाही अघि बढाएका थिए जसमा लागू पदार्थको सट्टा पिठो र निगरानी गर्ने उपकरण राखिएको थियो।उक्त अनुसन्धान अन्तर्गत अर्जेन्टिना र रूसमा गिरफ्तारीहरू गरिएको जनाइएको छ।

अर्जेन्टिनाको सुरक्षा मामिला मन्त्री प्याट्रिसिया बुलरिचले ब्युएनोस आएरेस स्थित दूतावासमा जफत गरिएको कोकेन एकदमै शुद्ध रहेको र त्यसको मूल्य ५ करोड यूरो भएको जानकारी दिइन्।उनले उक्त कोकेन रूस र सम्भवत जर्मनीमा पनि पठाउन लागिएको उल्लेख गरिन्।

उक्त तस्करीका सन्दिग्ध नाइके जर्मनीमा रहेको र जर्मन प्रहरीले उनलाई पक्राउ गर्ने अपेक्षा आफूले गरेको पनि बताइन्।उक्त तस्करीलाई लिएर अर्जेन्टिनामा दुई र रूसमा तीन जना पक्राउ परेका छन्।रूसी सुरक्षा अधिकारीहरूले अनुसन्धानमा मद्दत गरेका थिए र अर्जेन्टिनामा पक्राउ गरिएका एक जना व्यक्ति बहालवाला प्रहरी अधिकारीहरू हुन्।