प्रदेशसभाका विपक्षी नेता पोखरेलको निधन

राजनीति माघ ६ २०७६ ekhabarnepal
1579532375pokharel baldev

बुटवल, माघ ६, २०७६– प्रदेश- ५ को प्रदेशसभामा विपक्षी दलका नेता बलदेव शर्मा पोखरेलको निधन भएको छ।

प्रदेश सभामा नेपाली कांग्रेस संसदीय दलका नेता रहेका ८२ वर्षीय पाखरेलको सोमबार आफ्नै निवासमा निधन भएको कांग्रेस रुपन्देहीका सचिब रामकृष्ण खाणले जानकारी दिए।

प्युठानको झिमरुक गाउँपालिका तुसारामा जन्मिएका पोखरेल दशकौंदेखि रुपन्देहीमा राजनीतिमा सक्रिय थिए।
१९९४ सालको माघ १९ गते प्युठानको तुसारामा जन्मिएका पोखरेल नेपाली कांग्रेसको समानुपातिक कोटाबाट प्रदेशसभा सदस्य बनेका थिए । उनी प्रदेशसभाकै जेष्ठ सदस्यसमेत थिए ।

२०१३ सालदेखि नेपाल छात्र संघबाट राजनीति सुरू गरेका पोखरेल २०१८ सालमा २ वर्ष नेपालगञ्जमा जेल परेका थिए । २०२६ सालदेखि २०३६ सालसम्म कांग्रेस रुपन्देहीको सचिव भएका पोखरेल कांग्रेस केन्द्रीय कार्यसमितिमा आमन्त्रित सदस्य सम्म भए ।

पोखरेललाई गत वर्ष माघमा छातीमा क्यान्सरको संक्रमण देखिएको थियो । र पछिल्लो समय शरीरभर फैलिएको थियो । लामो समय नर्भिक अस्पताल काठमाडौं र पछिल्लो समय रुपन्देहीको क्रिमसन अस्पतालमा उपचार गराएका शर्मालाई हालै मात्र घर लगिएको थियो ।

२०२० सालदेखि रुपन्देहीको खैरियामा बस्दै आएका पोखरेलका एक पत्नी, चार छोरा र दुई छोरी छन् ।


क्यान्सरको समस्याले ग्रस्त पोखरेल अस्पतालको उपचार पश्चात् रुपन्देहीको तिलोत्तमा-१४ खैरियास्थित आफ्नै निवासमा रहँदै आएका थिए ।


 

प्राप्त प्रतिकृयाहरू

To Top