दाङ ३ (ख) मा नेकपाकी विमलाकुमारी र बागलुङ २ (ख) मा जनमोर्चाका खिमबिक्रम विजयी

राजनीति मंसिर १६ २०७६ ekhabarnepal
Dang

काठमाडौं, मंसिर १६
प्रदेशसभा उपनिर्वाचन अन्तर्गत दाङ ३ (ख) मा नेकपाका उम्मेदवार बिमलाकुमारी खत्री विजयी भएकी छन्।

२४ हजार २८६ मत ल्याएर खत्री विजयी भएकी हुन्। उनका निकटतम प्रतिद्वन्द्वी कांग्रेसका केशवराज शर्माले १९ हजार १८२ मत ल्याएका छन्।

यो क्षेत्रमा ०७४ सालको चुनावमा तत्कालिन एमालेका उत्तरकुमार ओली २३ हजार ९७० मत ल्याएर विजयी भएका थिए। त्यतिबेला कांग्रेसले १७ हजार ५३५ मत ल्याएको थियो।

खत्री ५ हजार १०४ मतान्तरले विजयी भएकी हुन्।

अन्तिम मत परिणामअनुसार साझा पार्टीका उम्मेदवार शिवकुमार चौधरीले २६६, राप्रपाका भूपाल रावतले २२५, समाजवादीका डिल्लीबहादुर डाँगीले १५४, राष्ट्रिय प्रजातन्त्र पार्टी संयुक्तका छोटी लाल थारुले १३८, नेकपा मालेका हरिप्रसाद डाँगीले १०३, मंगोल नेशनल पार्टीका घनश्याम चौधरीले ९० मत प्राप्त गरेका निर्वाचन अधिकृतको कार्यालयले जनाएको छ।

दाङ ३ (ख) मा ६८ हजार ७ सय १९ मतदाता मध्ये ४५ हजार ७ सय १८ मत खसेको थियो। ७ सय ९७ मत बदर भएको छ।


बागलुङ २ (ख) मा जनमोर्चाका उम्मेदवार विजयी

बागलुङ क्षेत्र नम्बर २ (ख) मा भएको उपनिर्वाचनमा वाम गठबन्धनका उम्मेदवार राष्ट्रिय जनमोर्चाका खिमबिक्रम शाही विजयी भएका छन्।

सत्तारुढ नेकपाको समर्थन पाएका शाहीले कांग्रेसका उम्मेदवार जीत शेरचनलाई पराजित गरेका हुन्।

शाहीले ११ हजार २ सय ३५ मत प्राप्त गर्दा शेरचनले ९ हजार १ सय ३८ मत प्राप्त गरेका छन्। शाहीले २ हजार ९७ मत बढी ल्याएका हुन्।

गएको निर्वाचनमा पनि यो क्षेत्रमा वाम गठबन्धनका उम्मेदवार विजयी भएका थिए। वामपन्थी दलको समर्थनमा राष्ट्रिय जनमोर्चाको तर्फबाट विजयी टेकबहादुर घर्तीको निधन भएपछि यहाँ उपनिर्वाचन भएको हो।

त्यतिबेला घर्तीले ११ हजार ८ सय ८४ मत प्राप्त गरेका थिए भने कांग्रेसका जित शेरचनले ८ हजार ६ सय ६४ मत प्राप्त गरेका थिए।

यस पटकको निर्वाचनमा समाजवादी पार्टीका अशोक कुमार बिकले ३ सय १६ मत प्राप्त गरेका छन् भने स्वतन्त्र उम्मेदवार शेरमान घर्तीले ९५ मत पाएका छन्।

प्राप्त प्रतिकृयाहरू

To Top