सभामुख विरुद्ध बलात्कार आरोप, सचिवालयले भन्छ– कठपुतली तयार पारियो (विज्ञप्तिसहित)

राजनीति असोज १४ २०७६ ekhabarnepal
Krishna mahara111 1

बुटवल, अशोज १४ ।

प्रतिनिधिसभाका सभामुख कृष्णबहादुर महरामाथि बलात्कार गरेको जस्ताे गम्भीर आरोप लागेको छ ।

एक महिला कर्मचारीले सभामुख महराले आफूलाई बलात्कार गरेको भनी सञ्चार माध्यमहरुलाई बताएकी छन् । पटक–पटक मन्त्री भइसकेका सभामुख महरालाई ती महिला कर्मचारीले बलात्कारको आरोप लगाएपछि सभामुखको सचिवालयले खण्डन गरेको छ ।

सोमबार राति खण्डनपत्र सार्वजनिक गर्दै सभामुख महरामाथि लागेको आरोपप्रति ध्यानाकर्षण भएको जनाइएको छ । सभामुख महरामाथि लगाइएको आरोप निराधार, कपोलकल्पित र निकै गम्भीर भएकाले यसको खण्डन गरिएको व्यहोरा उल्लेख गरिएको छ ।

उक्त पत्रमा सभामुख महरा आइतबार दिउँसो १२ बजे सिंहदरबार गएको र त्यस लगत्तै निवास फर्किएको बाहेक अन्यत्र नगएको पनि उल्लेख गरिएको छ ।

महराका प्रेस सल्लाहकार डिल्ली मल्लले सार्वजनिक गरेको वक्तव्यमा लेखिएको छ, “चश्मा, जुत्ताका कुरा पूरै निराधार भएको र उहाँको चश्मा आफैसँग रहेको र सभामुखज्यूले त्यसप्रकारको जुत्ता समेत प्रयोग नगरेको पनि यहाँ उल्लेख गर्न चाहन्छु ।”

संसद सचिवालयका ती महिला कर्मचारीले सरुवा नमिलेको असन्तुष्टिमा यस्तो आरोप लगाएको व्यहोरा खण्डनपत्रमा उल्लेख गरिएको छ ।

लेखिएको छ, “राजनीतिक व्यक्तित्व र छविलाई अरु कुनै पनि हतियारबाट गलाउन नसकेपछि एउटा ‘कठपुतली’ तयार गरी जसरी सामाजिक रुपमा बदनाम गर्न दुस्प्रयास गरिएको छ, यसको जति कडा शब्दमा भत्र्सना गरे पनि कम हुन्छ ।”

सभामुख महरा विरुद्ध एक महिलाले आफ्नो तीनकुनेस्थित डेरामा आएर बलात्कार गरेको आरोप लगाएकी छन् ।

मैले नै पढाको हुँ: महरा
सभामुख महराले ती महिलालाई आफूले नै हुर्काइ, पढाइ गरेको दाबी गरेका छन्।

‘मैले उनलाई २०४७ सालदेखि चिन्छु। मैले नै हुर्काइ, पढाइ गरेको हुँ। उनका पति मेरा साथी हुन्’, महराले नेपालखबरसँग भने, ‘घटना त्यस्तो विल्कुल होइन। समायोजनमा बाहिर फालिँदाको रिस ममाथि पोखेकी हुन्।’

केही समयअघि सामान्य प्रशासन मन्त्रालयले कर्मचारीको समायोजन गरेको थियो। त्यसमा ती महिला काठमाडौं बाहिर परेको महराको दाबी छ।

‘लालबाबुले गर्ने काम मैले कसरी मिलाउनु, त्यसपछि उनले रिस फेर्ने काम गरेकी हुन्’, उनले भने।

सभामुख राज्यको सम्मानित पद हो। राज्यको बरियताक्रममा यो पद राष्ट्रपति, उपराष्ट्रपति, प्रधानमन्त्री, प्रधान न्यायाधीशपछि पाँचाैं नम्बरमा छ।

यस्तो छ निजी सचिवालयको खण्डन (विज्ञप्ति )

सम्माननीय सभामुख कृष्णबहादुर महरालाई गम्भीर आरोप लगाई विभिन्न अनलाइन सञ्चार माध्याममा आइरहेका समाचारहरुप्रति मेरो गम्भीर ध्यानाकर्षण भएको छ । सभामुखज्यूलाई कल्पनै गर्न नसकिने निकै गम्भीर आरोप लगाई आएको समाचारले हामी सबैलाई निकै स्तब्ध बनाएको छ । यी निराधार, कपोलकल्पित र निकै गम्भीर आरोपप्रति कडा आपत्ति जनाउँदै त्यसमा कुनै पनि सत्यता नभएकोले यस्तो भ्रममा नपर्न सबैमा जानकारी गराउँदछु । 

समाचारमा उल्लेख गरिएजस्तो ‘सभामुखज्यूले कसैलाई पनि दुव्र्यवहार गरेको कुरा’ कल्पना समेत गर्न सकिदैन । हिजो आइतबार घटना भएको भनी जसरी सभामुखज्यूको चरित्र हत्या गर्ने दुस्प्रयास भइरहेको छ त्यसमा कुनै पनि सत्यता नभएको म सम्पूर्ण मिडिया र सञ्चारकर्मी साथीहरुमा जानकारी गराउँछु ।

सभामुखज्यू हिजो असोज १२ गते आइतबार दिउँसो १२ बजे सिंहदरबारस्थित आफ्नो कार्यकक्षमा गएको र दिउँसो २ बजेतिर वालुवाटार निवासमा फर्किएको बाहेक उहाँ त्यसपछि अन्यत्र कहीँ नगएको पनि म यसै विज्ञप्तीबाट प्रष्ट पार्न चाहन्छु । साथै समाचारमा आएको जस्तो चश्मा, जुत्ताका कुरा पूरै निराधार भएको र उहाँको चश्मा आफैसँग रहेको र सभामुखज्यूले त्यसप्रकारको जुत्ता समेत प्रयोग नगरेको पनि यहाँ उल्लेख गर्न चाहन्छु ।

संघीय संसद सचिवालयमा स्वास्थ्य शाखाको कुनै दरबन्दी नभएको र संसद सचिवालयमा कार्यरत स्वास्थ्यकर्मीहरु र ती महिला कर्मचारीले समेत समायोजनको प्रसंग चल्दै गर्दा संसद सचिवालयमै स्वास्थ्यको दरबन्दी हुनुपर्छ भनी माग गरिरहेको अवस्था थियो । तर कर्मचारी समायोजनमा सामान्य प्रशासन र स्वास्थ्य मन्त्रालयले नै सबै प्रक्रिया मिलाउने हुँदा मैले त्यसमा काम नगरेको भनी स्वास्थ्य शाखाका कर्मचारीहरु र ती महिला पनि असन्तुष्ट थिए । सोही असन्तुष्टिलाई लिएर सभामुखज्यूको बारेमा पूरै गलत, कपोलकल्पित र अनर्गल समाचार प्रवाह भएकोमा सभामुखज्यू समेत निकै दुखित र आश्चर्यचकित हुनुभएको छ । 

यो प्रकरणबाट जुन किसिमले सभामुखज्यूको राजनीतिक उचाई, व्यक्तित्व र प्रतिष्ठालाई सिध्याउने षड्यन्त्र भएको छ, यो निकै सुनियोजित र योजनाबद्ध रुपमा भइरहेको छ । यो जहाँबाट भयो/भइरहेको छ, यो कुनै पनि किसिमले क्षम्य हुन सक्दैन ।

उहाँको राजनीतिक व्यक्तित्व र छविलाई अरु कुनै पनि हतियारबाट गलाउन नसकेपछि एउटा ‘कठपुतली’ तयार गरी जसरी सामाजिक रुपमा बदनाम गर्न दुस्प्रयास गरिएको छ, यसको जति कडा शब्दमा भत्र्सना गरे पनि कम हुन्छ । सभामुखज्यूलाई लगाइएको निराधार र कपोलकल्पित आरोपप्रति कडा आपत्ति जनाउँदै त्यसमा कुनै पनि सत्यता नभएकोले भ्रममा नपर्न सबैमा पुनः विनम्र अनुरोध गर्दछु ।

मिति, २०७६।०६।१३
डिल्ली मल्ल
सभामुखज्यूको प्रेस सल्लाहकार

प्राप्त प्रतिकृयाहरू

To Top