क्रिकेटमा ऐतिहासिक सफलता,  नेपालले जित्यो युएईविरूद्धको टी ट्वान्टी सिरिज 

खेल माघ २० २०७५ ekhabarnepal
News 47108642

काठमाडौं,माघ २० गते
तेस्रो तथा अन्तिम खेलमा यूएईलाई १४ रनले हराउँदै नेपालले ऐतिहासिक टी-२० सिरिज २-१ ले जितेको छ ।

वर्षाका कारण १० ओभरमा छोट्याइएको तेस्रो तथा अन्तिम टी-२० मा नेपालले यूएईलाई १०५ रनको लक्ष्य दिएको थियो । तर, यूएईले ८ विकेट गुमाएर ९० रन मात्र बनाउन सक्यो ।

रोमाञ्चक खेलमा यूएईलाई अन्तिम ओभरमा २० रन चाहिएको थियो । कप्तान पारस खड्काले ललित राजवंशीलाई बल दिए । पहिलो र दोस्रो बलमा विकेट लिएका उनले मात्र ५ रन दिँदै नेपाललाई पहिलो टी-२० सिरिज दिलाए ।

यूएईको सुरुवात भने निकै राम्रो थियो । सन्दीप लामिछानेको त्यो ओभरमा २० रन जोडेको थियो । पहिलो विकेटका लाम गुलाम शब्बर र अस्फाक अहमदले २९ रनको साझेदारी गरे । तर, दोस्रो ओभरको अन्तिम बलमासोमपाल कामीले अस्फाकको विकेछ लिए ।

दुबईमा नेपालले बनाएको १०४ रनको लक्ष्य पछ्याएको युएई ९० रनमा सीमित भएपछि नेपालले पहिलो पटक ऐेतिहासिक टी-२० प्रतियोगितामाथि पनि कब्जा जमाएको हो।

यो जितसँगै नेपालले युएई भ्रमणबाट थु्प्रै सफलता हात पारेको छ। टोलीले पहिलो पटक एकदिवसीय र टी-२० अन्तर्राष्ट्रिय शृङ्खला दुवै जित्न सक्यो।

रोहित पौडेल एकदिवसीय क्रिकेटमा अर्धशतक प्रहार गर्ने कान्छो खेलाडी बने भने २० ओभरमा सानो उमेरमा अर्धशतक बनाउने कीर्तिमान सन्दीप जोराको नाममा रह्यो।

एकदिसीय शृङ्खला खेलेसँगै नेपाल एकदिवसीय वरीयतामा पनि समावेश भएको छ।

नेपालले युएईविरुद्धको पहिलो टी-२० अन्तर्राष्ट्रिय शृङ्खला जितेसँगै राष्ट्रिय क्रिकेट टोलीलाई बधाईको ओइरो लागेको छ।

राष्ट्रिय क्रिकेट टोलीलाई बधाई दिनेमा राजनीतिक दलका नेताहरूदेखि क्रिकेटका प्रशंसकसम्म छन्।

उपराष्ट्रपति नन्दबहादुर पुनले बधाई दिँदै भनेका छन्, "नेपाली क्रिकेटमा इतिहास रचेर सारा नेपालीलाई खुशी दिएकोमा राष्ट्रिय क्रिकेट टिमका प्रशिक्षक जगत तमटा, कप्तान पारस खड्का र सदस्यहरूप्रति विशेष धन्यवादसहित सम्मान व्यक्त गर्दछु।"

नागरिकका गुनासो सुन्ने सरकारी संयन्त्र हेलो सरकारले पनि ट्विटरमार्फत् बधाई दिएको छ।

उसले लेखेको छ, "युएईबाट फेरि खुशीको खबर आएको छ। नेपालले आफ्नो पहिलो टी-२० क्रिकेट शृङ्खला जितेको छ। यो जितले नेपाली क्रिकेटलाई थप हौसला दिएको छ। बधाई टीम नेपाल!"

परराष्ट्रमन्त्री प्रदीप ज्ञवालीले पनि नेपालको जितसम्बन्धी समाचार ट्विटरमा शेयर गर्दै राष्ट्रिय टोलीलाई बधाई दिएका छन्।

राष्ट्रिय सभाका अध्यक्ष गणेशप्रसाद तिमिल्सिनाले पनि बधाई दिँदै ट्वीट गरेका छन्।

"युएईविरुद्धको टी- ट्वान्टी अन्तर्राष्ट्रिय सिरिज २-१ ले जित्न सफल नेपाली क्रिकेट टिमलाई हार्दिक बधाई ज्ञापन गर्न चाहन्छु। युएईविरुद्ध एकदिवसीय सिरिजममा समेत विजयी भएको नेपालका लागि टी-ट्वान्टी सिरिजको जित अर्को ऐतिहासिक सफलता हो।"

पत्रकार मणि दाहालले लेखेका छन्, "अस्तिसम्म नेपालमा बलर मात्रै छन् जस्तो लाग्थ्यो। अहिले सबै ब्याट्सम्यान मात्रै देख्न थालेको छु।"

अर्का ट्विटर प्रयोगकर्ता डा. कमल अर्यालको ट्वीट छ, " देशले जित्दा सबै खुशी हुने नै रहेछन। आखिर कहिले बुझ्ने यस्तो कुरा ओहोदामा बसेकाहरूले? सुपर एक्साइटेड।"

ठट्यौली पारामा गौरव पोखरेलले लेखेका छन्, "आज नि युएईलाई जिताउन सकिएनछ।"


 

प्राप्त प्रतिकृयाहरू

To Top