विश्वका ११२ देशसँग नेपालको व्यापार घाटा,२८ देशसँग नाफा

अर्थ कार्तिक ९ २०७५ ekhabarnepal


 रासस

काठमाडौँ,कार्तिक ९ 
 विश्वका ११२ देशसँग नेपालको व्यापार घाटा रहेको तथ्यांक सार्वजनिक भएको छ । भन्सार विभागले सार्वजनिक गरेको चालू आर्थिक वर्षको पछिल्लो तीन महीनाको विवरणमा विश्वका १४० देशमध्ये २८ देशसँग मात्रै नेपालको व्यापार नाफामा रहेको छ भने ११२ देशसँग घाटा रहेको छ । 

नेपालको सबैभन्दा धेरै व्यापार घाटा छिमेकी देश भारत र चीनसँग नै रहेको छ । पछिल्लो तीन महीनाको विवरणअनुसार भारतसँग दुई खर्ब २२ अर्ब ९५ करोड ९२ लाख पाँच हजार रुपैयाँ बराबरको व्यापार घाटा छ । भारतबाट मात्रै दुई खर्ब ३६ अर्ब १२ करोड ३४ लाख १९ हजार रुपैयाँ बराबरको माल वस्तु आयात भएको छ । नेपालबाट भारततर्फ भने रु १३ अर्ब १६ करोड ४२ लाख १४ हजार बराबरको वस्तु मात्रै निर्यात भएको छ ।

व्यापार घाटाको दोस्रो स्थानमा रहेको चीनबाट पछिल्लो तीन महीनामा ५३ अर्ब ११ करोड ५६ लाख ८५ हजार रुपैयाँ बराबरको वस्तु आयात भएको छ । सो अवधिमा नेपालबाट ५६ करोड ४० लाख रुपैयाँ बराबरको माल वस्तु मात्रै निर्यात भएको छ । नेपाल र चीनबीचको व्यापार घाटा ५२ अर्ब ५५ करोड १५ लाख ८९ हजार रुपैयाँ रहेको छ ।

नेपालको तेस्रो व्यापार घाटा युरोपेली देश फ्रान्ससँग रहेको छ । १४ अर्ब २६ करोड ५३ लाख रुपैयाँ बराबरको माल वस्तु सो देशबाट आयात भएको छ भने नेपालबाट ३५ करोड २२ लाख ८८ हजार रुपैयाँ बराबरको सामान मात्रै निर्यात हुँदा व्यापार घाटा १३ अर्ब ९१ करोड ३० लाख १३ हजार रुपैयाँ हुन पुगेको छ ।

यस्तै युनाइटेड अरब इमिरेट्स(युएइ)सँगको व्यापार घाटा चौथो स्थानमा रहेको छ । उक्त देशबाट सात अर्ब ९० करोड ८३ लाख ८५ हजार रुपैयाँ बराबरको सामान आयात भएकामा नेपालबाट तीन करोड ७५ लाख ४७ हजार रुपैयाँ बराबरको सामान मात्रै निर्यात भएको छ । सो देशसँग नेपालको व्यापार घाटा सात अर्ब ८७ करोड ८३ लाख ८० हजार रुपैयाँ बराबर छ ।

नेपालको व्यापार घाटा रहेका देशमा थाइल्याण्ड, स्वीट्जरल्याण्ड, इन्डोनेशिया, क्यानडा, मलेसिया, अर्जेन्टिना, युक्रेन, साउदी अरब, दक्षिण अफ्रिका, इटाली, भियतनाम, दक्षिण कोरिया, अष्टेलिया, तुर्केमेनिस्तान, चीनको ताइवान, जापान, सिङ्गापुर, हङ्कङलगायत ११२ देश रहेका छन् । अल्वानियाबाट एक लाख १४ हजार रुपैयाँ बराबरको माल सामान आयात भएको छ भने नेपालबाट सो देशमा कुनै पनि माल वस्तु निर्यात हुन सकेको छैन ।

रुवाण्डाबाट एक लाख २२ हजार बराबरको मालसामान आयात भएकामा नेपालबाट दुई लाख २० हजार रुपैयाँ बराबरको निर्यात भएको छ । संयुक्त राज्य अमेरिकासँग भने नेपालको व्यापारमा फाइदा रहेको विभागको पछिल्लो विवरणमा उल्लेख छ । अमेरिकामा तीन अर्ब १९ करोड ७८ लाख ५९ हजार रुपैयाँ बराबरको व्यापार भएको छ । सो देशबाट नेपालमा दुई अर्ब ५२ करोड ९५ लाख ३५ हजार बराबरको समान आयात भएकामा ६६ करोड ८३ लाख रुपैयाँ बराबरको नाफा रहेको छ ।

नेपालको व्यापारमा नाफा रहेका देशमा नर्वे, फिनल्याण्ड, अष्ट्रिया, माल्दिभ्स, मोरक्को, इस्टोनिया, अफगानिस्तान, लेवनान, एल साल्भाडोर, उरुग्वे, साइप्रस लगायतका देश छन् । पछिल्लो तीन महीनामा तीन खर्ब ४९ अर्ब ८४ करोड २३ लाख २८ हजार रुपैयाँ बराबरको व्यापार घाटा हुन पुगेको छ । कूल तीन खर्ब ७३ अर्ब ५८ करोड ७२ लाख ५८ हजार बराबरको माल वस्तु आयात हुँदा २३ अर्ब ७४ करोड ४९ लाख ३० हजार रुपैयाँ बराबरको मात्रै निर्यात हुन सकेको छ ।
 

प्राप्त प्रतिकृयाहरू

To Top