समाचार / राजनीति

भ्रष्टाचारीदेखि गुन्डा नाइकेसम्म उम्मेदवार सिफारिस

असोज २६ २०७४     D.R. Ghimire
1442455024dan

काठमाडौं– प्रदेशसभा र प्रतिनिधिसभा निर्वाचन नजिकिँदै जाँदा दलहरुले विवादित अनुहारलाई पनि उम्मेदवारमा सिफारिस गर्न थालेका छन्। दलहरुको सिफारिस सूचीमा गुन्डा नाइकेदेखि भ्रष्टाचारको आरोपमा सर्वोच्च अदालतबाट ठहर तथा मुद्दा विचाराधीन भएका व्यक्तिसम्म परेका छन्।

 कांग्रेसबाट गुन्डा नाइके भनी कहलिएका मिनकृष्ण महर्जन सिफारिसमा परेका छन् भने अर्का विवादित व्यक्ति रोज राणा अर्थात् सरोज थापा पनि सूचीमा अटाएका छन्।

मिनकृष्ण महर्जनलाई ललितपुरबाट र राणालाई प्युठानबाट प्रदेशसभाको उम्मेदवारका लागि जिल्ला कमिटीले सिफारिस गरेको हो।

यस्तै राजनीतिक दल सम्बन्धी ऐन  र संविधानले समेत उम्मेदवारका लागि अयोग्य रहेका खुमबहादुर खड्कासमेत सिफारिसमा पर्न सफल भएका छन्। उनलाई नेपाली कांग्रेस दाङले प्रतिनिधि सभामा क्षेत्र नम्बर १ का लागि सिफारिस गरेको छ।

तनहुँबाट गोविन्दराज जोशी पनि सिफारिसमा परेका छन्। उनी तनहुँ–१ का लागि  सिफारिसमा परेका हुन्। जोशीको भ्रष्टाचार मुद्दा सर्वोच्च अदालतमा फैसलाको पालो पर्खेर बसेको छ।  तर दलका नेताहरुले विवादस्पद छबि भएका व्यक्तिहरु प्रतिनिधि सभा र प्रदेश सभामा नपर्ने दाबी गर्दछन्। विवादित उम्मेदवारलाई बोर्डले काँटछाँट गर्ने बोर्डका सदस्य पूर्णबहादुर खड्काले बताए। नेपाली कांग्रेसले बुधबार मात्रै उम्मेदवार छनोट गर्न संसदीय बोर्ड गठन गरेको छ।

‘जिल्ला कमिटीले मान्छे रिझाउन विवादित केही नाम समेत सिफारिस गरेका छन,’ खड्काले भने, ‘संसदीय बोर्डले संविधान र कानुनलाई मध्यनजर गर्दै उम्मेदवारको टुंगो लगाउँछ।’
 
 ‘सार्वजनिक आचरण खराब भएका व्यक्तिलाई एमालेले उम्मेदवार बनाउँदैन, तलबाट नाम सिफारिस भए पनि केन्द्रले अनुमोदन गर्दैन,’ एमाले सचिव प्रदीप ज्ञवालीले भने।
एमालेबाट सिफारिस भएका दीपक मनाङ्गेविरुद्ध विशेष अदालतमा सम्पत्ति शुद्धिकरण सम्बन्धी मुद्दा छ। उनको मुद्दा किनारा लागेको छैन। कांग्रेसका मिनकृष्ण महर्जनलाई अपहरण र फिरौती सम्बन्धी मुद्दा जिल्ला अदालत ललितपुरमा कायम छ।
मनाङ्गेपछि उम्मेदवार हुने दौडमा काभ्रेका गुन्डा नाइके गणेश लामा पनि लागेका छन्। विजयकुमार गच्छदार नेतृत्वको लोकतान्त्रिक फोरम नेपालका केन्द्रीय समितिमा रहेका लामा काभ्रेबाट सिफारिसमा पर्न लागीपरेका छन्। लोकतान्त्रिक मोर्चाका पाउने सिट सुनिश्चित नहुँदा हालसम्म उनको पार्टीले कुनै पनि क्षेत्रमा उम्मेदवार सिफारिस गरेको छैन।

नागरिकता त्यागेका पनि उम्मेदवार सिफारिस


लिशंखु पाखार गाउँपालिका–३ का विनोद मोक्तान नेपाली नागरिकता त्यागेर अमेरिकी नागरिक भएको १५ वर्षभन्दा बढी भइसकेको छ ।

अमेरिकामा होटल व्यवसाय सञ्चालन गरेर बसिरहेका मोक्तानलाई आर्थिक चलखेलमा नेपाली कांग्रेस सिन्धुपाल्चोकले मंसिरमा हुने प्रतिनिधिसभा र प्रदेशसभा निर्वाचनअन्तर्गत सिन्धुपाल्चोकको निर्वाचन क्षेत्र नम्बर १ बाट समानुपातिक उम्मेदवारमा सिफारिस गरेर कांग्रेस केन्द्रीय कार्यालयमा पठाएको छ ।
नेपाली नागरिक नै नभएकालाई समानुपातिकमा सिफारिस गरेपछि कांग्रेस सिन्धुपाल्चोकका नेता–कार्यकर्ता अचम्मित भएका छन् ।

क्षेत्र नम्बर १ बाट कांग्रेस नेता हरिशरण श्रेष्ठसहितका नाम मात्रै क्षेत्रीय समितिले सिफारिस गरेको थियो । तर, जिल्ला समितिले मोक्तानको नाम दुई नम्बरमा सिफारिस गरेर केन्द्रमा पठाएको छ ।

लामो समयदेखि अमेरिकामा बसेका मोक्तान अहिले सांसदमा सिफारिस गर्न भन्दै नेताहरूको घरदैलोमा धाउन थालेको कांग्रेस नेताहरूको आरोप छ । कांग्रेस नेता प्रकाशमान सिंहको घरमा पटकपटक पुगेर उनले आफूलाई समानुपातिक सांसद बनाइदिन आग्रह गरेका छन् । क्षेत्रीय समितिले सिफारिस नगरे पनि जिल्ला समितिले भने मोक्तानलाई सिफारिस गरेको कांग्रेस स्रोतको दाबी छ ।


 

0 प्रतिकृयाहरू प्राप्त

To Top