भ्रष्टाचार गरेको अभियोगमा आयोगले गर्‍यो लेखासहायकदेखि सचिवविरुद्ध विशेष अदालतमा मुद्दा दायर

राजनीति भाद्र १२ २०७४ रासस
Akhtiyar nepal

काठमाडौं, भदौ १२

अख्तियार दुरूपयोग अनुसन्धान आयोगले सामाजिक सुरक्षा भत्ता शीर्षकमा निकासा भएको दुई लाख ४५ हजार रुपैयाँ रकम भ्रष्टाचार गरेको अभियोगमा जाजरकोटका तत्कालीन सुवानाउली गाविसका सचिवविरुद्ध विशेष अदालतमा मुद्दा दायर गरेको छ ।

आयोगका प्रवक्ता जीवराज कोइरालाका अनुसार तत्कालीन सुवानाउली गाविसका सचिवत्रय किरण न्यौपाने, चिरञ्जीवी जिसी, गोकर्णराज शर्मा र लेखा सहायक लक्ष्मीप्रसाद शर्माले आपसी मिलेमतोमा आर्थिक वर्ष २०६८/६९ देखि आव २०७१/७२ सम्मको सामाजिक सुरक्षा भत्ता दुरूपयोग गरेको पाइएको छ ।

लक्षित वर्गलाई सामाजिक सुरक्षा भत्ता वितरण नगरी बदनियतपूर्वक हिनामिना गरेको र गैरकानूनी तवरले लाभ लिएको उजुरीका आधारमा छानबिन गर्दा भ्रष्टाचार गरेको पाइएकाले उजुरी दर्ता गरिएको हो ।

आयोगले तत्कालीन गाविससचिव न्यौपानेले दुई लाख ४५ हजार रुपैयाँ, जिसीले  एक लाख ७५ हजार रुपैयाँ, शर्माले  ९४ हजार रुपैयाँ र लेखा तथा प्रशासन सहायक लक्ष्मीप्रसाद शर्माले  पाँच लाख ७९ हजार रुपैयाँ भ्रष्टाचार गरेको पाइएकाले बिगो असुल गरी हदैसम्मको कारबाहीको माग गरिएको आयोगले जनाएको छ ।

यस्तै, आयोगले आइतबारै पालुङटार नगरपालिका गोरखामा कार्यरत सब इञ्जिनियर सुनिल देवकोटालाई भूकम्पपीडितलाई घर निर्माणका लागि प्रदान गरिएको अनुदान रकमको दोस्रो किस्ता भुक्तानी दिने सिलसिलामा सिफारिस गरेबापत  २५ हजार रुपैयाँ घूस माग्दा माग्दै आइतबार पक्राउ गरेको छ ।

 

प्राप्त प्रतिकृयाहरू

To Top